ម៉ារ៉ុក៖ ក្រុមហ៊ុនអាកាសចរណ៍ Royal Air Maroc នឹងដាក់ដំណើរការជើងហោះហើរពិសេសចំនួន ៣០ ក្នុងគោលបំណងដឹកអ្នកដំណើរជាអ្នកគាំទ្រក្រុមជម្រើសជាតិម៉ារ៉ុក ពីទីក្រុងធំបំផុតរបស់ខ្លួនគឺ Casablanca ទៅកាន់ទីក្រុងដូហាប្រទេសកាតានាថ្ងៃពុធនេះ ក្នុងគោលបំណងចូលរួមទស្សនាការប្រកួតរវាងក្រុមជម្រើសជាតិម៉ារ៉ុករបស់ខ្លួន ជួបជាមួយក្រុមជើងឯកឆ្នាំ២០១៨ បារាំង។ នេះបើតាមការឱ្យដឹងពីក្រុមហ៊ុនអាកាសចរណ៍ផ្ទាល់។

តាមសេចក្តីជូនដំណឹងនេះ ក្រុមហ៊ុនអាកាសចរណ៍ Royal Air Maroc នឹងដំណើរការជើងហោះហើរពិសេសនេះចំនួន ២ថ្ងៃ គឺនៅថ្ងៃអង្គារនេះ នឹងនៅថ្ងៃពុធស្អែក។

ជើងហោះហើរពិសេសនេះគឺជាការអបអរសាទរជាមួយប្រជាជនម៉ារ៉ុកផ្ទាល់ ក៏៏ដូចជាមោទនភាពសម្រាប់ប្រទេសទាំងមូលតែម្តង ក្នុងនាមជាប្រទេសអាហ្វ្រិកដំបូងគេដែលបានឈានដល់វគ្គពាក់កណ្តាលផ្តាច់ព្រ័ត្រនៃពានរង្វាន់ពិភពលោក FIFA World Cup។ 

គួរបញ្ជាក់ថា អ្នកដំណើរតាមរយៈជើងហោះហើរពិសេសនេះ នឹងទទូលបានការបញ្ចុះតម្លៃជាពិសេស ហើយនឹងចូលរួមជាមួយអ្នកគាំទ្ររាប់ពាន់នាក់ផ្សេងទៀតរបស់ម៉ារ៉ុក ដែលកំពុងមានវត្តមាននៅទឹកដីកាតាស្រាប់។

ការប្រកួតវគ្គពាក់កណ្តាលផ្តាច់ព្រ័ត្ររវាងក្រុមជម្រើសជាតិម៉ារ៉ុក ជាមួយក្រុមជម្រើសជាតិបារាំង នឹងធ្វើឡើងនៅវេលាម៉ោង ០២៖០០នាទីទាបភ្លឺយប់ថ្ងៃពុធ ឈានចូលថ្ងៃព្រហស្បតិ៍ស្អែកនេះ នៅកីឡដ្ឋាន Al Bayt៕